Friday, December 01, 2006

Pa Belo Picaso

Ibas sada kuta antah-berantah, lit sekalak anak perana pangke tergelar Pa Belo. Ibahan kalak gelar populerna Pablo Picaso. Sabab amin anak perana pe ia pet rusur man belo ras mekatep ka bentingkenna piso. Emaka Pablo Picaso jadina, ras Pa Belo nina kalak rusur. Seh rawana. Tempa la merga kesah man bana. Persoalen sada tinaruh nggit ka ia bene sada idung kerbo, bagem kira-kira ia. Labo kai pe lit tempa kebiarenna. Saja bagi 'reman Beganding', nina kuan-kuan si adi. Adi ngalaken tembuk lada labo kal ia sangsi, tapi adi udan kenca wari minter ia kiam, nina. Persoalen si mbelin man kalak sideban labo ia sangsi, tapi masalah sepele mis ka ambil langkah seribu. Perban bage me pengkebetna jadi centeng kuta me ia, amin mbelang nge kebun sawit orang tuana.

Tupung sie lit ka sekalak si nguda-nguda. Tuhu meparas ras timbas kal daging ibabana. Bagi istilah si genduari lit 3B-na. Brain, Behavior ras Beauty. Enggo ka ia sekalak si pentar, lagu-langkahna mejile la teralang, janah rupana lanai terkata-belasken meparasna. Tuhu-tuhu kal inner beauty lit ibas ia. Kerna beritana enggo me termur-mur seh belang-belang kuta, janah ia me erbahansa Pa Belo bertekuk lutut. Enggo menda piga-piga paksa ia erkuan rassa. Icidahken Pa Belo uga tuhu-tuhu mbelin sura-surana gelah banci ngerana saja ras atena ngena e. Apaika terdauhen, gelah banci man si rukat nakanna. Ah, seh maka erbage-bage cara iusahakenna. Persaingen si la sehat pe nggo me itempuhna guna ngolangi kalak si deban rate ngena man Beru Karo ah ndai si metami la teralang.

Ibas kerja tahun enda, mulih ka menda Beru Karo ibas ingan sindauh nari si sangana sekolah man asamna pagi nggeluh ipudi wari metua. Perbahan berita e seh ku cuping Pa Belo, minter iaturna strategi guna banci jumpa pedempak ayo ras atena ngena e. Seh maka birokrasi isusun rapi, janah kerina biaya ras perpinem kalak suruh-suruhenna e ibereken Pa Belo alu melumbar gelah ula gagal sura-surana e. Kerina e ikirana jadi investasi saja gelah jumpa ras Beru Karo. "Tidak ada makan siang gratis", nina ibas ukurna.

Tuhu tupung acara anak peranan ras si nguda-nguda enterem kal jelma si pulung, terlebih kenca menai erkata gendang kibot. Wari pe seh kal nge jilena bali ras ukur Pa Belo si erurak-burak nandangi jumpa ras Beru Karo. Bulan pe molah-olah i datas langit mesawang mbincarken sinalsalna si macem-macem. Asum e iteh Pa Belo nge uga teremna anak perana si deban si ersura-sura ngerana-ngerana atena ras Beru Karo. Tentu labo saingen si sembarangen. Hanya saja ngalaken si bage rupana lit ka kin talenta Pa Belo, uga ngaturken kaki-tanganna harus bekerja keras. Emaka jumpa me ia duana pedempak ayo ibas acara ngendang kibot e. Andiko... sap so nina pusuh Pa Belo ngidah-ngidah Beru Karo dauh-dauh nari. Seumpama bunga ncole i tengah kerangan. Bagi sedak akapna erkemesah. Emaka dungna ipala-palaina kundul menda ia diher Beru Karo.

Hening sejenak.

"Mejuah-juah Agi, ma berita si mehuli nge babandu i kuta dauh nari?" nina Pa Belo.

"Mejuah-juah Kaka. Kam gia ma labo kam bangger-bangger kidekah enda i kuta?" nina Beru Karo ngaloi.

"Labo lit banggerna seakatan bangger nandangi kena ngenca, melenget- meriso nanamna", nina Pa Belo mulai erbahan taki-taki.

"Ah, kam pe erbeluhna kuidah kam ngrana," nina tole Beru Karo. "Banci nge aku erlajar bandu?" sambung Beru Karo.

"Kidekah kam la i kuta, natap ancuk-ancuk rumahndu ah pe nggo me tempa-tempa malem pusuhku e Agi. Emaka bagenda kam sangana mulih ku kuta, tuhu-tuhu sia-sia terang bulan e Agi adi la jumpa ras Kam". Nina Pa Belo terus pedarat jurus-jurus mautna.

"Payo kin si belas kendu ena Tur...?" lenga dung Beru Karo erbelas lit ka kalak si erdilo mindo Beru Karo reh ku rumah. Emaka ranan Pa Belo pe terpaksa i bukui terjeng ije lebe. Maka ku rumah me Beru Karo ngata bana man Pa Belo. Kepeken enggo ka lit si nimai Beru Karo i rumah. Ah, kepeken temanna marenda asum SMA denga si nggo ndekah la jumpa perbahan ngalanjut sekolah i kepar lawit si mbelang. Emaka tande piga-piga tahunna labo ia mulih ku kuta. Kepeken gundari ia mulih perban nandangi dungna menda gundari sekolahna. Teridah tuhu meriah cakapna i rumah duana ije pe nande ras bapa Beru Karo.

Pepagina sontar me bual Pa Belo i kede kopi.

"Labo ndai aku erlayam ku tiga...!!!" nina Pa Belo tarenna nemtem meja. Piah merap me kirina si lit idatasna. Juak-juakna pe enggo tempa mekerbu perbahan biarna.

"Darami ise kin dilaki ah ndai. Kataken man bana, adi atena jadi anak kuta enda denga ula cubakenna main-main ras aku. Lanai pagi lit tanah kerah kuta enda man bana", nina tole Pa Belo empangiri anak buahna alu sora si megang.

"Tenang kam lebe Kila", nina sekalak anak buahna si kebetulen erkila tuturna. "Adi anak perana ah ndai labo mesera ngatasisa. Mait pe banci nge bahan la teridah. Tapi uga naluken ukur Beru Karo? E nge si perluna", nina erbelas.

"Uuue, tuhu payo kuakap si kataken nah Bos. Peteneng lebe ukurndu!" nina sekalak nari. "Perlu nge kuakap si ubah paradigma. Adi si nguda-nguda ma man kelengen nge, labo man pebiar-biaren?" nina.

"Jadi, tadingken tumbuk lada enda Katam?" nina Pa Belo janahna ngamparken pisona. Bagi terpan cakap anak buahna ia. Sebab lanai tehna uga dalanna jumpa ras Beru Karo.

"Ue Kila, adi banci bukndu ena irebonding ntah pe ban potongenna bagi Brad Pitt, gelah medate ukur si nguda-nguda nandangi Kam", nina ka tole anak buahna.

"Pedah kin Kam, Bos, anak-anak mbaru mberkat pe gundari enggo merari pegacih rondong. Sen pencarinna pe lengo lit man kelenkenna. Nina kin kuan-kuan si adi. Bagi kaperas lau Mambang, enggo piran lenga pe galang. Emaka soal si rukat nakan ula pedah kam sangsi Bos, serahken man kami!", nina ka tole peteneng ukur Pa Belo.

"Mmmhhh", nina Pa Belo lenga bo tembe kal ukurna.
"Sambari inemen enda Perkede!", nina tole ngata man perkede, sebab nggo tungkas kerina inemenna.

"Gurdak gitar ena Geleng, ban laguna Tading Botolna", nina temanna si deban.


"Baju bekasku nukur Karo, Parfum si kutukur Turang
iasamkendu ngerondong ras dilaki si deban
", rende ia kerina.