Saturday, August 26, 2006

Dialog Imajiner dengan Bulang Pelcik

Sekali paksa ibas waktu si adi, lit sekalak tetua ibas kuta. Ia igelari Bulang Pelcik, pengembara sejati si nteguh njagai ras tutus ndalanken sangkep nggeluh kalak Karo. Apai ka kenca enggo ia metua. Bagenda me sitik turi-turin kerna bulang enda.

"Pelcik kin ukurndu e Bulang?", nina kalak rusur nungkuni.

"Pelcik Kempu!", nina ka rusur jababsa adi ia lawes sisada ku ingan si ndauh guna nambari penakit jelma si nterem. Dungna piah enterem pe tua-tua ras pe si nguda denga ngelebuh ia jadi Bulang Pelcik, si tergelar Guru Papak Tonggal Sendalanen. Hee, Adi isungkuni ndigan nge ia tubuh? Ia pe labo datsa. Yah, jababna pe rusur bagi si merambo-merambo nge. Bagenda kap nina rusur, sangana linur Batu Karang nai umurna nina enggom seh sepulupitu tahun. Enggo aku ngasup erdalin pitu berngi lewat i tengah kerangen si mangko-angko, nina. Tupung linur e, aku sanga ngguru i Tanah Alas, nina ka rusur. Gundari jabuna nge bagi si nggo merap marpar bagi cingkeru irambasken, merap si marparna. Sangana ia erlajang i Aceh erjabu ia ijah. Lt pe telu pupusna dilaki ras diberu. Dungna, erlajang ka menda ia ku Pak-pak, janah ijah pe lit ka ienadingna sekalak anak diberu. Asum ia tading i Batu Karang, empo ka ia sekali nari, ije pe lit ka anakna dua dilaki.

Anum labo menda merandal pengidah perjabun bulang enda, lanai terkata-belasken, tapina adi ngerana kerna adat ningen, ia nge nomor sadana. Lalit temanna erbual nge maka atena ndele. Banci ka pe peterangken adi ia nuri-nuri. Umpamana sekolah ia banci kataken enggo me datsa gelar Doktor-na, bagelah. Adi kita ngerana ras ia, segelas kopi pe bayarna enggo me bias, banci kita erbual rassa erjam-jam dekahna. Ijelasina A-B-C seh ku Z kerna peradaten kalak Karo.

Ersura nge min ia gelah pemetehna si mbue ras mbages pengangkanna e banci ipembarkenna ku jelma si enterem. Cuma saja, la ka piga si merudu megi-megi ia nuri-nuri. Apaika anak si nguda gundari, iah, la kin iakapna menarik bagelah. Ngeranai soal sibage rupana lanai up to date nina generasi si genduari. Hanya saja, lit ka kepe dua kalak anak perana pangke temanna rusur meriah erbual. Anak didikna, bage me ningen, sabab ia duana ngenca rusur merincuh ercakap-cakap kerna budaya ras bulang enda. Tergelar me si Pascal (Pas kal, bage bahasa Karona) si sangana sekolah i Bandung ras sekalak temanna Randall (alias merandal), ia pe sangana sekolah i Yogya. Tupung duana ia mulih ku kuta, reuni me kalak enda teluna erbual i jambur lintas generasi.

"Bagenda Kempu, adi sipergermetken deh kam, adatta kalak Karo e seh kal payona. Sangkep nggeluh ibas kita emkap rakut si telu, eme kalimbubu, senina ras anak beru. Mehamat kam erkalimbubu, mediate ersenina ras metami man anak beru. Ngkai kita mehamat erkalimbubu? Erkiteken kalimbubu e Dibata nidah ibas kita kalak Karo. Artina bagenda, kalimbubu kap si mereken kegeluhen ntah pe ndehara guna man sinusurta pepagi. Adi nai Dibata simereken ndehara (Hawa) man Adam, emaka kalimbubu igelari pe Dibata nidah. Pihak si mereken kemberahen, ma hebat nge konsep kalak Karo e, bagepe kerna ersenina ras er-anak beru. Adi kerina kapndu kita ndalanken adat e bagi arusna tentuna enggo me kita nggeluh alu ratur ras mejile", nina Bulang Pelcik menai cakapna.

"Payo, tuhu si turikendu ena Bulang, tapina enggo ka me enterem kita si erbahan si lanai bagi arusna. Rubat ersenina, megatipe mekarus nandangi kalimbubu, janah ras anak beru pe labo ka menda si angkaan. Uga menda Bulang, adi budayanta enggo kendor perban talu bersaing ras budaya sideban. Jadi sifat gotong-royongta pe menam lanai teridah. Enggo erbana-bana teremen. Individualisme, eme budaya sidarat nari e. Budaya si tungkat-tungkat galuhna", nina Randall jabab ranan Bulang Pelcik.

"Ue ,ue ,lit kin perbagidina bagi katandu ena Kempu. Saja, solang kataku ndai dehkam. Adina kam tutus ibas adat nggeluh maka la banci lang jadi kalak si pentar me Kam. Adi ngasa nguda denga umurndu enggo iangkandu peradaten maka Kam pe jadi kalak si bijak. Tupung Kam jadi sekalak kalimbubu umpamana, paksa e kam erlajar uga jadi sekalak peminpin, kalak si ni ergaken. Paksa kam ka sekali jadi anak beru, ije kam erlajar ka uga jadi sekalak juak-juak. Ntah pe kam biak ersenina maka arus me kam erlajar ngangkai ukur temanndu sesama.

E, dehkam bayak kal kita adi beluh kam erlajar adat e. Emaka lawes pe kam ku ingan kalak si deban, enggo me kam beluh nampilken bana. Sebab ngena nge ate jelma si enterem ngenehen lagu langkahndu. Ngkai? Sebab beluh Kam ngangkai ukur kalak si deban. Bicara tamaken pe Kam jadi peminpin uga pe enggo me kam beluh sebab kam pernah jadi kalimbubu, ntah bicara kam pe jadi sekalak bawahen, epe tentuna enggo me Kam ngasup, sebab rusur nge inanamindu ibas peradaten kalak Karo", bagem nina Bulang Pelcik ngaloi ranan Randall.

"Andiko! Hebat kap tuhu filosofi adatta ibas kalak Karo enda ndai Bulang", nina ka Pascal ngaloi alu itegukna inemenna. "Tapi, budayanta kalak Karo bas prosesna ndube, tupung nini-nininta nai la kap bagi genduari tantangen geluhna Bulang"! Adi jaman si adi, sekali rani ku juma enggo bias man nakan dua tahun. Ndarami nurungna pe labo bagi gundari kal serana ateku ka. Jamanna kin gundari enda enggo harus bersaing ketat Bulang, adi lang banci kap kita ketadingen. Emaka rayak-ayak me enterem jelma ndarami serpi jadi perayaken geluhna", nina ka Pascal tole.

"Enam, enam, serpi kin rusur iban jadi perayaken nggeluh, emaka ula ateta mamang enggo ceda jadina. Adi sen asakai pe labo mbera bias", nina ka Bulang Pelcik alu pekusurna perkundulna. "Tuhu nge kita perlu serpi Kempu, tapi adi e ban jadi perayaken banci kita bene ibahanna. Seri ngenda bagi kapal dehkam Kempu. Tuhu nge kapal perlu lau maka banci erdalan, tapina adi lau enggo masuk ku bas kerina kapal e, emaka nandangi tenggelam me ia. Emaka ula kari bagi kuan-kuan kita kalak Karo, taren ngayak-ngayak si man tadingenken, tading si man ayaken", nina ka Bulang Pelcik adu argumen ras kempuna si nggo me pentar kerina.

"Gundari ma jamanna globalisasi, lanai terjeng kalak Karo nari ngenca kita erteman meriah. Enggo mendunia, tanpa batas nina kin Bulang. Arah teknologi informasi enggo ka kita banci erteman ras kalak sideban i seluruh dunia. Real time information nina kin bahasa manggerisna Bulang. Gelah kita banci maju kita perlu ka network ato pe jaringen. Emaka hubungenta pe lanai terjeng kutata saja ngenca tapi enggo ka seh belang-belang dunia. Kai si terjadi ibas negara kalak si deban lampas ka nge sieteh ijenda. Dehkam hebat enggo tuhu perkembangen jaman enda ndai Bulang?", nina Randall si ndubem la ngerana.

"Ue...ue! lit perpayona bagi katandu ena Kempu", nina ka Bulang Pelcik merasa terdesak alu argumen-argumen kempuna. "Tapi bagenda Kempu", isambung nini Bulang ka tole. "Nggo me tuhu kita nggeluh ibas jaman modern enda, bagi nindu ndai, banci ka nggo melala tandai kalak i luar negeri ari, tapi ermundur kange kuidah adatta ndai. Ngkai" Kalak si ndauh banci Kam erteman meriah, tapi jelma si sebelah rumahndu banci ka menda lanai itandaindu. E, e, dehkam enggo me erjuluna tambat bubunta e?", balas Bulang Pelcik alu sengit.

"Ioo...oh, jitu kal nge tuhu katandu ena ndai Bulang. Cuma saja menurut pengidahku, lit kang kuakap produk gagal ibas budayata kalak Karo enda ndai", nina ka Pascal nerusken bualna i jambur.

"Kai kin maksudndu produk gagal e Kempu?", nina ka Bulang Pelcik alu meter sitik.

"Oh, oh, sentabi Bulang adi akapndu kin kari la pas pengeranaku. Nguda kin denga ia atendulah", nina ka Pascal. "Adi nai kalak Karo erkerja ntah pe erjabu katakenlah bage, ma lit rusur nai niktik wari ato pe erbahan ngerasin. Serasi ntah lang? Adi payo kin sie ndai ma aturenna min enggo kal ndai kita kerina jore. Tapi la kap bage kedungena Bulang? Itehndu maka kemberahen perbapan si adi lebih nge rusur asangken sada. Sibayak pe nai enterem rusur ibahanna kemberahenna. Adi bage ma labo ka nge pas piga-piga budayanta si adi ateku ka", nina ka tole kempuna Pascal.

"U.. u..ue, nina bulangna ngaloi alu betat-betat melasken kata. Tempa-tempa lanai beluh ngantusisa ranan e, sebab ia nge tempa ujungna ranan e. "Em dehkam, adi ndekah kita nggeluh, maka mbue ka nge si dat pemeteh. Adiken si adi si akap payo, banci ka gundari manai teng-teng", nina Bulang Pelcik berfilosofi. "Emaka lit kuakap perpayona adi si natang layar-layar ngerungguken si enda kerina ras pe pemangku budayata, gelah banci ipepayona si apai budayata si lanai teng-teng ibas jaman gundari enda. Umpamana, budaya rebu misalna ntah pe petunggungken ibas kerja nereh empo. Dehkam nggo ka kita erlajar erbual. Padahal adi nai si e labo lit", nina Bulang Pelcik ka ngaloi.

"Tuhu katandu ena Bulang. Tupung kita erkerja, mbue rusur waktu terbuang la efisien. Ntah e pe perlunge si rubah gelah ulanai kita katepen buen ngerana tapi labo mbue manfaatna. Nina pe si meteh surat, budaya e labo statis tapina lit nge rusur perubahen sesuai ras tantangen jamanna. Saja lit si perlu ilestariken, umpamana bahasa Karo enggo enterem lanai beluh ercakap Karo. Tole nari, aksara Karo pe nggo me merata si lanai metehsa, kesenian Karo gendang lima sendalanen, bagepe ras budayanta sidebanna", nina Randall nerusken ranan Bulang Pelcik.

"Bagenda dehkam Kempu", nina ka Bulang Pelcik janahna narik kesahna ence ipulahina manjar-anjar. "Aku pe sangana gundari e erlajar ragama kap nge. Enggo me mbages ku sik-siki ntah arah agama e nge maka banci kudat kedamen nggeluh ateku ka. Emaka enggo me piga-piga kali aku erlajar arah pandita bage pe pertua", nina ka tole nambahisa.

"Tuhu kin bage Bulang?", nina kempuna duana.

"Payo Kempu!"

"Haleluyaaa... Haleluyaaa... Haleluyaaa....", rende me duana kempuna e alu ukur meriah.

"Tidak ada yang abadi di dunia ini, kecuali perubahan itu sendiri", nina ukur Bulang Pelcik ibas pusuhna. HABIS!